వకీల్ సాబ్ సెట్స్ లో ఉల్లాసభరితంగా పవన్ కల్యాణ్... ఫొటోలు ఇవిగో!

పవర్ స్టార్ పవన్ కల్యాణ్ నటిస్తున్న చిత్రం వకీల్ సాబ్. తాజాగా ఈ చిత్రంలో పవన్ పై సన్నివేశాల చిత్రీకరణ పూర్తయింది. ఈ సందర్భంగా పవన్ సెట్స్ లో ఉల్లాసంగా గడిపారు. చిత్ర యూనిట్ సభ్యులతో సంతోషాన్ని పంచుకున్నారు. దర్శకుడు వేణు శ్రీరామ్ తోనూ, నిర్మాత దిల్ రాజుతోనూ... ఇతర యూనిట్ సభ్యులందరితోనూ ఫొటోలు దిగారు. సామాజిక మాధ్యమాల్లో ఈ ఫొటోలు వైరల్ గా మారి, సందడి చేస్తున్నాయి. పోలీస్ అని రాసివున్న ఆర్మర్ ను పవన్ తదేకంగా చూస్తున్న ఫొటో అందరినీ ఆకర్షిస్తోంది.

బాలీవుడ్ లో హిట్టయిన పింక్ చిత్రాన్ని తెలుగులో వకీల్ సాబ్ పేరుతో తెరకెక్కిస్తున్నారు. ఈ రీమేక్ చిత్రానికి వేణు శ్రీరామ్ దర్శకత్వం వహిస్తున్నాడు. ఇందులో పవన్ సరసన శ్రుతి హాసన్ కథానాయికగా నటిస్తోంది. కీలక పాత్రల్లో అంజలి, నివేదా థామస్, అనన్య నటిస్తున్నారు. దిల్ రాజు, బోనీ కపూర్ సంయుక్తంగా నిర్మిస్తున్నారు.