దాదాపు 150 ఏళ్ల తరువాత కనిపించిన అరుదైన సొరచేప!

చిలియన్ ఏంజిల్ షార్క్ అనే అరుదైన సొర చేప ఇటీవల చిలీ దేశ మత్సకారులకు చిక్కింది. దీంతో, శాస్త్రవేత్తల్లో ఆనందం వ్యక్తమవుతోంది. ఇప్పటివరకూ ఈ సొర గురించి పూర్తి సమాచారం లభించక శాస్త్రవేత్తల్లో అసంతృప్తి ఉండేది. 

1887లో చివరిసారిగా ఈ చేపను ఓ పరిశోధకుడు తీరప్రాంతపు లోతు తక్కువ నీళ్లల్లో గుర్తించాడు. అప్పట్లో ఈ సొరను అతడు రే చేపగా పొరబడ్డాడు. అయితే, చేప గురించి అతడి వివరణ అసంపూర్ణమని ఆ తరువాతి పరిశోధనల్లో తేలింది. ఇది చాలదన్నట్టు నాటి సొర కళేబరం కనబడకుండా పోవడంతో శాస్త్రవేత్తలకు ఈ జీవిని అధ్యయనం చేసే అవకాశం లేకుండా పోయింది. సముద్రజీవాల సమాచారంలో ఇదో పెద్ద లోపంగా మారింది. చివరకు మిస్టరీగా మారింది.  ఇలాంటి సమయంలో చిలియన్ ఏంజిల్ సొర మళ్లీ కనిపించడంతో శాస్త్రవేత్తల్లో ఆనందం వ్యక్తమవుతోంది. 

దాదాపు మూడు అడుగుల పొడవుండే ఈ సొర..సముద్రపు నీటి అడుగున ఉంటుందని శాస్త్రవేత్తలు చెబుతున్నారు. రే చేప ఆకారంలో ఉండటం దీని ప్రత్యేకత అని చెబుతున్నారు. చాలా అరుదుగా మాత్రమే ఇది సముద్రాల్లో కనిపించడంతో దీనిపై శాస్త్రవేత్తల వద్ద అంత సమాచారం లేదు. ఈ సొర అంతరించిపోయే ప్రమాదాన్ని ఎదుర్కొంటోందని కూడా శాస్త్రవేత్తలు చెబుతున్నారు. తాజాగా దొరికిన సొరల అధ్యయనంతో వీటి సంరక్షణకు మరిన్ని మెరుగైన చర్యలు చేపట్టొచ్చని అశాభావం వ్యక్తం చేశారు.