ప్రేమ కోసం ఘాతుకం.. మిల్క్‌షేక్‌తో తండ్రిని హత్య చేసిన మహిళా పోలీస్!

మహారాష్ట్రలోని చంద్రపూర్‌లో అత్యంత దారుణమైన ఘటన వెలుగులోకి వచ్చింది. ప్రేమకు అడ్డుచెబుతున్నాడన్న కారణంతో, కన్న తండ్రినే ఓ మహిళా పోలీస్ హత్య చేసింది. ఏడాది క్రితం జరిగిన ఈ హత్యను సహజ మరణంగా చిత్రీకరించగా, ఇటీవల ఆమె భర్త ఇచ్చిన వాంగ్మూలంతో అసలు నిజం బట్టబయలైంది. ఈ ఘటనలో మృతుడు, నిందితురాలు ఇద్దరూ పోలీసులే కావడం గమనార్హం.

వివరాల్లోకి వెళితే, చంద్రపూర్ జిల్లాకు చెందిన జయంత్ బల్లావర్ (45) పోలీస్ అధికారిగా పనిచేస్తున్నారు. ఆయన కుమార్తె ఆర్యా బల్లావర్ కూడా పోలీస్ ఉద్యోగిని. 2023 ఏప్రిల్ 25న జయంత్ విధులకు సిద్ధమవుతుండగా, ఆర్యా ఆయనకు మిల్క్‌షేక్ ఇచ్చింది. అది తాగిన కాసేపటికే ఆయన కార్యాలయ ప్రాంగణంలో కుప్పకూలి మరణించారు. అప్పట్లో దీన్ని ఆకస్మిక అనారోగ్యంగా భావించి, పోస్ట్‌మార్టం కూడా నిర్వహించకుండా కేసును మూసివేశారు.

ఆర్యా బల్లావర్ 2022 నుంచి ఆశీష్ షెడ్‌మేక్ అనే వ్యక్తితో ప్రేమలో ఉంది. వీరి సంబంధాన్ని తండ్రి జయంత్ వ్యతిరేకించారు. దీంతో తమ ప్రేమకు అడ్డుగా ఉన్న తండ్రిని తొలగించుకోవాలని ఆర్యా, ఆశీష్ నిర్ణయించుకున్నారు. దీనికోసం ఆర్యా తన కజిన్ చైతన్య గెడం సహాయంతో రూ.5,000కు విషం కొనుగోలు చేసింది. ఆ విషాన్ని మిల్క్‌షేక్‌లో కలిపి తండ్రికి ఇచ్చి హత్య చేసింది.

తండ్రి మరణం తర్వాత ఆర్యా, ఆశీష్ వివాహం చేసుకున్నారు. అయితే, కొన్నాళ్లకే వారి మధ్య గొడవలు మొదలయ్యాయి. పోలీసు శిక్షణలో క్రమశిక్షణారాహిత్యం కారణంగా ఆశీష్‌ను ఉద్యోగం నుంచి తొలగించారు. దీంతో వారి మధ్య విభేదాలు మరింత పెరిగాయి. ఈ క్రమంలోనే గత వారం ఆశీష్ స్వయంగా పోలీస్ స్టేషన్‌కు వెళ్లి, ఏడాది క్రితం జరిగిన హత్య గురించి మొత్తం చెప్పేశాడు. తన భార్య ఆర్యనే పక్కా ప్లాన్‌తో తండ్రిని చంపిందని వాంగ్మూలం ఇచ్చాడు.

ఆశీష్ వాంగ్మూలంతో కేసును రీఓపెన్ చేసిన పోలీసులు... ఆర్యా బల్లావర్, ఆమె భర్త ఆశీష్ షెడ్‌మేక్, కజిన్ చైతన్య గెడంతో పాటు విషం సరఫరా చేసిన మరో వ్యక్తిని అరెస్ట్ చేశారు. నలుగురినీ కస్టడీలోకి తీసుకుని విచారిస్తున్నారు. పోలీసు శాఖలోనే పనిచేస్తున్న కూతురు కన్న తండ్రిని ఇంత దారుణంగా హత్య చేయడం స్థానికంగా సంచలనం సృష్టిస్తోంది.