త్రిష కాదు.. తిరుచ్చి ఈస్ట్ టీవీకే అభ్యర్థిగా రాఘవ లారెన్స్?

తమిళనాడు రాజకీయాలు ఇప్పుడు సరికొత్త సమీకరణాలతో హీటెక్కుతున్నాయి. ఇటీవలే ముగిసిన అసెంబ్లీ ఎన్నికల్లో సూపర్ హిట్ విజయం సాధించి, ముఖ్యమంత్రి పీఠాన్ని అధిరోహించిన దళపతి విజయ్ నేతృత్వంలోని 'తమిళగ వెట్రి కళగం' (TVK) పార్టీ... ఇప్పుడు రాబోయే ఉపఎన్నికపై పూర్తి ఫోకస్ పెట్టింది. విజయ్ తాను గెలిచిన రెండు అసెంబ్లీ స్థానాల్లో ఒకటైన తిరుచ్చి ఈస్ట్ స్థానానికి రాజీనామా చేయడంతో ఇక్కడ బైపోల్ అనివార్యమైంది.

అయితే, ఈ స్థానం నుండి టీవీకే అభ్యర్థిగా ఎవరు నిలబడబోతున్నారనే దానిపై గత కొన్ని రోజులుగా జరుగుతున్న ప్రచారానికి తెరపడేలా ఒక క్రేజీ అప్‌డేట్ బయటకు వచ్చింది. ప్రముఖ నటుడు, కొరియోగ్రాఫర్, దర్శకుడు రాఘవ లారెన్స్ పేరు ఇప్పుడు తిరుచ్చి ఈస్ట్ రేసులో అత్యంత బలంగా వినిపిస్తోంది.

మొదట్లో ఈ స్థానం నుండి స్టార్ హీరోయిన్, విజయ్ స్నేహితురాలు త్రిష పోటీ చేయబోతోందంటూ తమిళ మీడియాతో పాటు సోషల్ మీడియాలో పెద్ద ఎత్తున ఊహాగానాలు వచ్చాయి. విజయ్ సరసన ఎన్నో హిట్ సినిమాల్లో నటించిన త్రిషను రాజకీయాల్లోకి దించుతున్నారనే వార్త హాట్ టాపిక్‌గా మారింది. కానీ, తాజా సమాచారం ప్రకారం త్రిషకు ప్రస్తుతానికి ప్రత్యక్ష రాజకీయాల్లోకి వచ్చే ఉద్దేశం ఏమాత్రం లేదని తేలిపోవడంతో ఆ ప్రచారానికి పూర్తిగా బ్రేక్ పడింది.

రాఘవ లారెన్స్‌కు ఉన్న మాస్ ఇమేజ్, ముఖ్యంగా యువతలో ఉన్న ఫాలోయింగ్, మరియు ఆయన చేసే సేవా కార్యక్రమాలు పార్టీకి భారీగా కలిసివస్తాయని టీవీకే అధిష్ఠానం భావిస్తోంది. లారెన్స్ మొదటి నుంచి విజయ్‌కి గట్టి మద్దతుదారుడిగా ఉంటున్నారు. గత ఎన్నికల్లో టీవీకే సాధించిన క్లీన్ స్వీప్ విజయంపై లారెన్స్ ఓపెన్‌గానే అభినందనలు కురిపించారు. అలాగే ఇటీవల విజయ్ ప్రభుత్వం తీసుకున్న కొన్ని కీలక నిర్ణయాలను కూడా ఆయన సమర్థించారు.

అయితే, రాజకీయాల్లోకి వచ్చే ఈ కీలక నిర్ణయంపై లారెన్స్ ఇప్పటికే తన గురువు, సూపర్ స్టార్ రజినీకాంత్‌తో చర్చించినట్లు తెలుస్తోంది. తలైవా రజినీకాంత్ ఇచ్చే సలహాలు, ఆయన ఆశీస్సులు తీసుకున్న తర్వాతే లారెన్స్ తన పొలిటికల్ ఎంట్రీపై అఫీషియల్ అనౌన్స్‌మెంట్ చేసే అవకాశం ఉందని ఇండస్ట్రీ వర్గాలు చెప్తున్నాయి.